Ahmedabad: કમોસમી વરસાદથી શાકભાજીની આવક ઘટી, ભાવ વધારાની શક્યતા
તાજેતરમાં ગુજરાતમાં વરસેલા કમોસમી વરસાદના કારણે રાજ્યના મુખ્ય APMC (એગ્રિકલ્ચર પ્રોડ્યુસ માર્કેટ કમિટી) માર્કેટોમાં શાકભાજીની આવકમાં ઘરખમ ઘટાડો નોંધાયો છે. આ અણધાર્યા માવઠાને પગલે ખેતરોમાં પાકને ભારે નુકસાન થયું છે, જેની સીધી અસર બજાર પર જોવા મળી રહી છે.
કમોસમી વરસાદના કારણે શાકભાજીની આવક ઘટી
સામાન્ય દિવસોમાં જ્યાં બજારો ગ્રાહકો અને વેપારીઓની અવરજવરથી ભરચક રહે છે, ત્યાં હાલમાં સન્નાટો છવાયેલો છે. શાકભાજીની કુલ આવકમાં 60 ટકા જેટલો મોટો ઘટાડો નોંધાયો છે. કેટલાક મુખ્ય શાકભાજીની આવક તો સંપૂર્ણપણે બંધ થઈ ગઈ છે. આમાં મુખ્યત્વે ટમેટા, કોથમીર, મરચાં, ફુલાવર અને કોબીનો સમાવેશ થાય છે. ખાસ કરીને દક્ષિણ ગુજરાત અને સૌરાષ્ટ્ર જેવા વિસ્તારોમાંથી આવતા શાકભાજીની આવક ખૂબ જ ઘટી ગઈ છે, કારણ કે આ વિસ્તારોમાં વરસાદનું જોર વધુ હતું.
ગ્રાહકો પર અસર: ભાવ વધારાનો ભય
શાકભાજીની આવકમાં આટલો મોટો ઘટાડો થતાં, સ્વાભાવિક રીતે જ બજારમાં તેની અસર દેખાશે. આવક ઘટવાને કારણે હવે નજીકના દિવસોમાં શાકભાજીના ભાવ વધે તેવી પૂરેપૂરી શક્યતા છે. માંગ સામે પુરવઠો (Supply) ઓછો થતાં, બચેલો માલ ઊંચા ભાવે વેચાશે, જેનો સીધો બોજ સામાન્ય ગ્રાહકો પર પડશે. આ કમોસમી વરસાદ ખેડૂતો અને વેપારીઓ બંને માટે આફત બનીને આવ્યો છે અને ટૂંક સમયમાં જ ગૃહિણીઓના બજેટ પર પણ તેની અસર દેખાશે.