કલેક્ટરે ધ્રોલમાં શાળાએ જતાં વિદ્યાર્થીઓ સાથે સંવાદ કર્યો:રસ્તામાં વાહન રોકાવી બાળકો સાથે શિક્ષણ અને પોષણ અંગે ઊંડાણપૂર્વક માહિતી મેળવી
જામનગર જિલ્લા કલેક્ટર કેતન ઠક્કરે ધ્રોલ તાલુકાના પ્રવાસ દરમિયાન શાળાએ જઈ રહેલા વિદ્યાર્થીઓ સાથે સંવાદ કર્યો હતો. તેમણે રસ્તામાં વાહન રોકાવી બાળકો સાથે શિક્ષણ અને પોષણ અંગે ઊંડાણપૂર્વક ચર્ચા કરી હતી. કલેક્ટર કેતન ઠક્કર જિલ્લાના વિકાસ કાર્યો અને વહીવટી કામગીરીના નિરીક્ષણ અર્થે ધ્રોલ તાલુકાના પ્રવાસે હતા. આ દરમિયાન તેમને માર્ગમાં શાળાએ જતા વિદ્યાર્થીઓનો સમૂહ મળ્યો હતો, જેના પગલે તેમણે વાહન થોભાવી બાળકો સાથે વાતચીત શરૂ કરી હતી. આ સંવાદમાં કલેક્ટરે બાળકોને શાળામાં અપાતા શિક્ષણ, શિક્ષકોનો સહકાર અને તેમના મનપસંદ વિષયો વિશે પૂછપરછ કરી હતી. તેમણે શાળામાં થતી અભ્યાસ પ્રવૃત્તિઓ અને અભ્યાસેતર પ્રવૃત્તિઓ વિશે પણ માહિતી મેળવી, જેથી શિક્ષણની ગુણવત્તાનું નિરીક્ષણ થઈ શકે. વધુમાં, કલેક્ટરે ભારત સરકારની મધ્યાહ્ન ભોજન યોજના હેઠળ શાળામાં અપાતા ભોજનની ગુણવત્તા અને સ્વાદ અંગે સીધી માહિતી મેળવી હતી. તેમણે બાળકોને ભોજન પૂરતું મળે છે કે કેમ અને મેનૂ મુજબ ભોજન અપાય છે કે કેમ તે વિશે પણ પૂછપરછ કરી હતી. આ મુલાકાત દરમિયાન બાળકોએ પણ ખચકાટ વગર પોતાના અનુભવો કલેક્ટર સમક્ષ રજૂ કર્યા હતા. કલેક્ટરે બાળકોને પ્રોત્સાહિત કર્યા અને તેમને નિયમિત શાળાએ જવા તથા પોતાના સપના પૂરા કરવા માટે મહેનત કરવા પ્રેરણા આપી હતી. કલેક્ટર કેતન ઠક્કરની આ પહેલ દર્શાવે છે કે, જિલ્લા વહીવટી તંત્ર માત્ર કાગળ પરની સમીક્ષામાં જ નહીં, પરંતુ જમીની સ્તરે ઉતરીને બાળ કલ્યાણ અને શિક્ષણની ગુણવત્તા સુનિશ્ચિત કરવા માટે પણ પ્રતિબદ્ધ છે.